Dakula an epekto kan mga palpak na flood control projects kan gobierno sa sektor nin agrikultura.
Sigun ki Department of Agriculture (DA) Assistant Sec. Arnel de Mesa, apektado kan mga pagbaha huli sa mga dae marhay na flood control projects an mga omahan asin mga tanuman nin gulay.
Dugang pa kan opisyal, mantang naghahaloy na nakababad sa baha an mga paroy asin mga tanom na gulay an mas haloy man an recovery kan mga ini.
Kaya importante na marhay an mga flood control project asin an iba pang solusyon digde kaibahan na an mga dam asin water impounding projects.
Kadakol soboot na ginigibong siring na istruktura an gobierno tanganing maipon an tubig asin malikayan an pagbaha.
Marurumduman, enot nang pigsaysay kan DA na nasa P3 billion an pigwalat na danyos sa agrikultura kan mga Bagyong Crising, Dante, asin Emong kan bulan nin Hulyo.
