NAGA CITY- Pigsasairarom na suboot sa maninigong eksaminasyon an sample kan dugo na nadukayan kan mga otoridad sa lugar kun saen inilubong nin buhay an sarong umboy na nangyari sa banwaan nin Goa, Camarines Sur suodma.
Ini an kinumpirmar ni Goa Mayor Raquel Lim sa ekslusibong entrevista kan Bombo Radyo Naga.
Sigon sa alkalde, nagpoon na an mga barangay health workers (BHW) asin mga otoridad sa pagtrace sa ina kan nasambitang umboy mantang nagpaparahay pa ini sa Bicol Medical Center.
Inaaram na kan mga BHW sa nasambitang barangay kun sisay an mga bados sa lugar na nangaki kan nakaaging mga aldaw para sa marikas suboot na pagkakabisto kun sisay an ina na nagwalat kan umboy.
Sigon ki Lim, pigsasairarom na sa maninigong eksaminasyon an sample kan dugo na nadukayan sa lugar para makatabang sa paghahanap kan nasambitang suspek.
Dae man hinahale ngonyan kan alkalde na posibleng dayo sana sa barangay Bagumbayan an ina kan umboy asin pinili sana kaini na sa lugar ilubon an aki para dae ini mahanap kan mga otoridad.
Sa huri, pigsierto ni Lim na mapadagos an saindang paghahanap sa ina kan nasambitang umboy.
