Nag-file nin petition for correct manifest error an board of canvassers kan Barangay San Francisco sa siyudad kan Naga huli sa salang pagbilang kan boto kan nakalihis na Barangay asin Sk eleksyon, Oktubre 30, 2023.
Sa entrevista kan Bombo Radyo Naga ki Atty. Maico Julia Jr., Eelection officer Comelec Naga pigsaysay kaini na igwa nin duwang kagawad an sala na nai-proklamar kaya man nag abot nin haros sarong taon antes masalidahan an pwesto kan dapat na nanggana huli ta sa panundon kan comelec dae na pwedeng baguhon an resulta sa oras na nakapagproklamar na an comelec asin BAC.
Dugang pa kaini, na ngunyan na bulan sana nin Oktubre nag abot an petisyon kaya man pig-orderan an board of canvassers kan nasambitan ng barangay na mag-reconvene tanganing i-correct mga salang mga numero kan nakalihis na birilangan.
Pigsaysay pa ni Julia na an nagin proseso sa pag file nin petition to correct manifest error iyo an pag-agi sa main office kan comelec kaya man haloy asin inabot na nin haros sarong taon antes mag abot an nasambitan ng petisyon.
Pigsaysay pa kaini na pig-abisuhan naman soboot kan Comelec an mga BOC asin pig-abisuhan na igwang ipapataw na penalidad enkaso mautro pa an siring na pangyayari.
Alagad, pwede pa man soboot na magin board of canvassers liwat an mga ini ngunyan na papaabuton na eleksiyon.
Marurumduman nagkaigwa naman nin filing of petition kan mga nakalihis na taon sa SK sa nasambitan na barangay.
Katakod digde, mawot man kan opisyal na mas marahay kun magin automated naman an pagbilang kan mga boto sa Brgy asin SK tanganing accurate, marekas an resulta, asin malikaya an mga kaparehas na sitwasyon.
Sa ngunyan, dagusan na man na naiproklamar an duwang kagawad kan nakalihis na Byernes.
