Nangapudan sa gobyernong Marcos si Senador Christopher “Bong” Go na itao an nakatagamang pondo para sa Philippine Health Insurance Corp. (PhilHealth) na nagkakantidad nin P200 bilyon tanganing mapahewas an sakop kan programang pangsalud asin makasagip nin buhay kan kadakol kan namamanwaan.
Sigun ki Go, dae bilog na naitatao sa PhilHealth an kabilogan na nakatagamang pondo digde gikan sa mga buwis na nakokolekta sa mga sigarilyo, arak asin softdrinks, sigun sa mandato kan Sin Tax Law puon kan 2023.
Nag-iiral an Sin Tax Reform Law o Republic Act 10351 kan 2012 asin nagtakda ini nin kantidad para sa PhilHealth na dae pigtatao nin bilog o kaya ganap na dae pigtao siring kan 2024 asin 2025.
Kun ipagsasararo soboot an mga tinapyas asin dae naitao, pigkakarkulong mapakol gabos sa P200B.
Pigtawan duon ni Go, kun itatao sana an kabilogan na kantidad, milyon-milyong Pinoy an makikinabang sa Universal Health Care Program na pigpapautob na primero kan PhilHealth, kairiba an Department of Health.
Komo vice chairman kan Senate committees on health and finance, pigbatikos kaini an paglilipat kan pondo kan PhilHealth sa National Treasury asin inaapod ining dae katanggap-tanggap asin labag sa konstitusyon, sigun na man sa desisyon kan Supreme Court sa nasambitan na paglilipat kan 2024 asin nautro pa ngunyan na 2025.
Dapat soboot mahatudan an mga namamanwaan kan mga de-kalidad na serbisyong pangsalud, orog na sa parte kan tios alagad napagkakaitan dahil sa hindi bilog na pondo sa PhilHealth.
Dapat kaiba man soboot makinabang magin an mga health care workers digde, partikular an saindang emergency allowance.
Siring man, sinabi ni Go na sa ibong kan mga kakulangan sa pondo, dapat pa man maghiro an PhilHealth asin DOH para makamit an obheto kan programang UHC.
