NAGA CITY- Sinimbag ngonyan ni Christopher ‘Bong’ Go an kahaputan kan nagkapirang mga kritiko kun tano pirmi pa nanggad siyang nag-iiba sa lakaw ni presidente Rodrigo Duterte dawa nagbutas na siya komo Special Assistant to the President (SAP).
Sigon ki dating SAP Go, dae niya basang na papabayaan an hepe ehekutibo huli ta igwa siyang promesa digdi na iibanan sa saiyang trabaho komo presidente.
Mientrastanto, tinawan doon ni Go na sa saiyang ‘personal capacity’ an ginigibo niyang pagtabang ki presidente Duterte asin mayo ining kinaaraman sa saiyang kandidatura sa maabot na 2019 Midterm Elections.
Napag-araman na saro si Go sa mga kaibanan ni presidnte Duterte kan personal ining nagbisita sa mga nagadan asin nairidong pulis sa nangyaring pananambang sa banwaan nin Lupi, Camarines Sur.
Enot kaini, pormal nang nagbutas sa pwesto si Go makalihis na magdesisyon na madalagan sa pagkasenador sa pirilian sa masunod na taon.
