Aram baya nindo mga ka-Bombo, agaw pansin an video kan sarong green pigeon sa Northampton, England.
Nahiling an kakaibang kalapati sa hampangan kan All Saints Church, kabahan an nagkapirang mga kapwa kalapati.
Kadakol na netizens an nakaku nin video kan pigeon asin ini-upload sa manlaen-laen na social media platforms.
An Northampton an dae man talaga pigdudumanan kan mga turista alagad nagdakol an mga turistang nagbibisita sa saindang area tanganing mahiling sana an bright green pigeon.
Makalihis man na mag-viral sa social media an videos asin mga litrato, igwang nagkomento na baka ginibo soboot ini gamit an artificial intelligence.
Pwede man soboot niretoke sana an kulay gamit an computer apps. Alagad igwang mga taga-media na dinumanan mismo an gamgam tanganing mapatotoohang nag i-exist ini.
Kadakol man an nagpatotoo sa bright green pigeon asin aktuwal ining nakuanan kan mga taga-media nin ladawan asin videos.
Antes pa man an bareta dapit sa bright green pigeon, naenot nang nag-abiso an Royal Society for the Prevention of Cruelty to Animals (RSPCA) kontra sa trend na pigkukulayan an balahibo kan pigeon’s nin blue o kaya pink kun igwang gender-reveal parties.
An RSPCA, sarong charity organization sa England asin Wales na nag-aataman para sa kapakanan kan animals sa United Kingdom.
Mientrastanto, sigun sa tagapagtaram kan RSPCA, an pagti-trending kan bright green pigeon sa social media an igwang potential harm sa gamgam. Pinagkakahaditan na baka magdakol soboot kaya an mag-dye kan mga feathers.
