Dai dapat na ipagpaoktaba an Barangay and Sangguniang kabataan Elections asin dai na kaipuhan pang tawan nin extension an pagserbi kan mga incumbent Brgy. Officials.
Sa intrevista kan Bombo Radyo Naga ki Vince Casilihan, sarong writer asin human rights advocate, mahigot na dai kaini inuyunan an pagpapaoktaba kan Barangay and Sangguniang Kabataan Elections.
Sigon digdi, saro sa mga sinasabing rason kan mga lehislador sa pagpaoktaba kan election an pagpadagos kan pagserbi kan mga incumbent officials alagad tinawan- doon kaini na mapadagos an serbisyo kan mga pulitiko dawa na siisay pa man an magtukaw sa posisyon.
Sarong dakulang political machinery kun an bilog na konseho matiner sa puesto mantang nagdadangadang an National Elections. Magigirumduman na gikan sa tolong (3) taon na pagserbi kan mga Brgy. Official, naging apat (4) na taon na ini kan nakalihis na taon. Dagdag pa ni Casilihan, dai dapat na pagpugulan na makaboto an publiko huli ta derechos ini kan lambang saro.
An mga lehislador iyo an dapat na maging boses kan lambang destrito tanganing darahon ini sa Kongreso.
Malinaw na an mga Kongresista o inaapod na mga Representatives na kun sain iyo an marepresentar sa Kongreso tanganing pag-urulayan kun ano an ikakarahay kan mga nasa baba.
Mientrastanto, tinawan -doon ni Casilihan na dai dapat nagagamit kan mga Alkalde, Congressman asin Gobernador an mga Brgy officials para sa pansadiring interes.
