Nakatutok an Comelec-Naga sa desisyon kan Senado sa proponidong pag-oktaba kan Barangay asin Sangguniang Kabataan Elections (BSKE) na nakatalaan sa Nobyembre 2, 2026.
Sa intrevista kan Bombo Radyo Naga kay Atty. Maico Julia Jr. Election Officer kan COMELEC NAGA, sinabi kaini na padagos na masunod an Comelec sa presenteng kalendaryo kan pirilian mantang mayo pang ley na nag-oktaba kan eleksyon.
An pag-oktaba kan BSKE posibleng magkaigwa nin direktang epekto sa planong plebisito para sa Ciudad nin Naga. Segun ki Julia, preparado na an Comelec na isagibo an plebisito, alagad kaipuhan pondohan ini kan lokal na gobyerno kan Naga.
Pwede man na maglangkaw an gastos kun magkasuhay an BSKE asin plebisito. Sa rason na ini, mas maray kun sabay-sabay an duwang aktibidad tanganing makatipid sa pondo kan lokal na gobyerno.
Mientrastanto, kun lubos na ma-oktaba an BSKE, maaapektaran man an mga preparasyon kan Comelec, kabali na an pag-imprenta kan mga balota, pagkua nin mga election supplies asin iba pang logistical requirements.
Mantang pighahalat an pinal na desisyon kan Senado, mantenidong preparado an Comelec-Naga sa anuman na resulta. Nangapudan si Julia sa mga botante asin kandidato na magdanay na updated sa mga opisyal na anunsyo manungod sa BSKE asin posibleng plebisito sa Naga.
