Nakua kan Bangko Sentral ng Pilipinas (BSP) an “Best Recirculation/ Distribution Initiative or Innovation” na premyo gikan sa International Association of Currency Affairs (IACA) para sa paglunsar kan Coin Deposit Machines (CoDMs) sa bilog na Metro Manila.
Inako ni BSP Assistant Governor Rosabel Guerrero an tropeyo sa ngaran kan bangko sentral sa seremonya para sa “2024 Excellence in Currency Awards for Coin” kan International Association of Currency Affairs na ginibo sa Lisbon, Portugal.
Susog sa ininternational body, an katuyuhan kan proyektong Coin Deposit Machines na ma-engganyar an mga Pilipino na gamiton an saindang mga sinsilyo na natipon komo karibay kan mga e-wallet credits asin shopping voucher nagpapahiling kan “forward-thinking approach” kan BSP pasiring sa mas epektibo asin sustenableng pag-ikot kan barya sa Pilipinas.
Sinambit man kan award-giving entity an positibong epekto kan Coin Deposit Machines sa buhay kan mga Pinoy na pwedeng gamiton an saindang e-wallet komo potensyal na “gateway” pasiring sa iba pang importanteng serbisyong pinansyal. Poon kan ini ilunsar kan 2023, an Coin Deposit Machines nakatipon nin labing P1 bilyon na kantidad nin mga sinsilyo.
Sa kapangganahan na ini, an BSP nag-anunsyar nin mga plano na orog pang mapalawig an proyekto sa paagi nin pagbugtak nin 25 pang mga makina sa bilog na nasyon sa 2025, na nagdadara kan total na numero kan mga Coin Deposit Machines sa 50. An enot na 25 makina yaon sa mga shopping mall sa Greater Manila Area.
