Pinuri at sinuportahan ni Senador Joel Villanueva ang panukala ng Bangko Sentral ng Pilipinas (BSP) na gumamit ng principles-based framework para sa salary-based personal loans, na magbibigay-diin sa kakayahan ng borrower na magbayad.
Ayon kay Villanueva, chair ng Senate committee on banks, makatarungan ang hakbang dahil mas isasaalang-alang nito ang aktuwal na financial capacity ng mga nangungutang kaysa sa dating rigid na loan term limits.
Sa draft circular ng Bangko Sentral ng Pilipinas (BSP), lilipat ang polisiya mula sa mahigpit na fixed loan terms patungo sa mas flexible na sistema kung saan ang repayment terms ay ibabatay sa creditworthiness, repayment history, at layunin ng utang, sa pagitan ng borrower at lender.
Dahil dito, aalisin ang dating limitasyon na hanggang tatlong taon para sa karamihan ng personal loans at maaaring umabot hanggang limang taon sa ilang special cases, depende sa kasunduan at risk standards.
Binigyang-diin ni Senador Villanueva na makatutulong ito sa layunin ng Kongreso na protektahan ang mga borrower mula sa hindi angkop na loan terms, habang tiniyak niyang babantayan ng Senado ang implementasyon ng bagong polisiya.
Dagdag pa niya, sabay-sabay na hakbang ng iba’t ibang ahensya gaya ng Government Service Insurance System (GSIS) at Social Security System (SSS) ang nagpapakita ng iisang direksyon sa pagtugon sa pinansyal na hamon ng mga Pilipino.
