Inaasahang magpupulong ang Estados Unidos at Iran sa Islamabad ngayong Sabado upang subukang tapusin ang anim na linggong digmaan, ngunit nalagay sa pagdududa ang usapan matapos maglatag ang Tehran ng mga kondisyon kaugnay sa Lebanon at sanctions.
Pinamumunuan ng US delegation si JD Vance, kasama sina Steve Witkoff at Jared Kushner, na patungo na sa Islamabad matapos ang refueling stop sa Paris.
Samantala, dumating na noong Biyernes ang delegasyon ng Iran na pinangungunahan nina Mohammad Baqer Qalibaf at Foreign Minister Abbas Araqchi.
Ayon kay Qalibaf, hindi sisimulan ang negosasyon hangga’t hindi natutupad ng Washington ang mga naunang usapan tulad ng pag-unblock ng Iranian assets at ceasefire sa Lebanon, na hiwalay pa sa kasalukuyang digmaan.
Iginiit naman ng US na hindi bahagi ng ceasefire deal ang Lebanon issue, habang nananatiling matatag ang Iran sa posisyong dapat isama ito sa kasunduan.
Sa social media post, sinabi ni US President Donald J. Trump na “wala umanong bargaining power” ang Iran, habang binigyang-diin na ang negosasyon lamang ang natitirang opsyon ng Tehran.
Ayon kay Vance, inaasahan nilang magiging positibo ang resulta ng usapan, ngunit nagbabala rin siya na hindi magiging madali ang negosasyon kung may pagtatangka umanong manipulahin ang US.
Samantala, mahigpit ang seguridad sa Islamabad kung saan libo-libong tropa at paramilitary forces ang ipinakalat para sa pagpapanatili ng kaayusan habang isinasagawa ang usapan.
Patuloy namang nananatili ang tensyon sa rehiyon kahit may dalawang linggong ceasefire, dahil hindi pa rin ganap na naaayos ang isyu sa Strait of Hormuz at sa hiwalay na sigalot sa Lebanon.
