Nakumpleto na kan pitong miyembro kan sikat na K-pop boy band na BTS an saindang obligadong serbisyo militar.
Ini makalihis na ma-discharge kan nakalihis na Sabado, Hunyo 21, an BTS rapper na si Min Yoon-gi o Suga gikan sa saiyang alternative military service komo social service agent.
Alagad maski dae binati ni Suga an media na nag-aabang sa luwas kan saiyang military base, pig-anunsyar ni Suga an saiyang discharge sa paagi kan South Korean mobile app na Weverse.
Digde man nagpasalamat si Yoon-gi sa mga Army (fans) sa saindang paghalat saiya, asin sinaysay kaini na sa duwang taon na serbisyo nagkaigwa ini nin oras tanganing magmuni-muni sa sadiri.
Naghagad man nin dispensa an BTS member sa isyu kan drunk driving kan nakalihis na taon, na sinaysay kaining naka-disappoint asin nagpagiromdom sa mga fans.
Marurumduman, na nagin kontrobersyal ini makalihis magpuli mantang nakainom gamit an saiyang scooter asin natumba sa hampang kan mismong harong ninda.
Alagad maski mayo man nalugadan sa insidente o naraot na establisyemento, alagad kan ini sinuri kan mga pulis na harani sa lugar, nakumpirmar na ini man naka-inom nin alkohol, rason tanganing pinagbayad asin pag suspendir kan saiyang lisensya
Si Suga an pinakahuring miyembro kan BTS na nakumpleto an obligadong serbisyo militar na kinakaipuhan sa South Korea.
Nag-enlist ini sa military kan Setyembre 2023.
Huli dide, pig-aantabayanan na kan mga fans na inaapod na ARMY an comeback kan BTS kasunod kan saindang indefinite hiatus puon kang 2022.
Base sa mga magkapirang source, kabali an mga opisyal gikan sa kompaniya kan BTS na HYBE, piglalaoman na mangyayari an comeback kan grupo sa Marso 2026.
