NAGA CITY- Bulto-bultong pigtutubudang flavoured shabu an nakumpiskar kan mga otoridad sa ginibong raid sa harong kan maglive-in partner sa Dona Clara Village, Conception Pequena, Naga City.
Binisto an mga suspek na sinda Edwin Almoite, 37-anyos asin Michelle Valencia,31-anyos.
Sa entrevista kan Bombo Radyo Naga ki SPO2 Tobby Bongon, tagapagtaram kan Naga City Police Office (NCPO), sinaysay kaini na nadakop an mga suspek sa pinagsarong pwersa kan Regional asin City Drugs Enforcement Unit (RDEU/CDEU).
Sigon ki Bongon, nakumpiskar sa mga suspek an nasa tolong bulto kan pigtutubudang shabu na may flavor soboot na tsokolate na kinakarkulong maabot sa labi P100,000 an kantidad kaibanan an mga drug paraphernalia.
Pigtutubudang mas halangkaw an kantidad kan nasambitan ng flavoured shabu huli sa kakaibang klase kaini.
Napag-araman na enot nang nakulong si Valencia huli sa parehong kaso alagad tulos man na nakalibre makalihis makapagpyansa.
Sa ngunian , pigpepreparar na an kasong isusunad kontra sa mga suspek mantang padagos pa an pigigibong imbestigasyon kan mga otoridad.
