Preparado na an Libmanan Municipal Police Station sa piglalaoman na pagdagsa kan mga turista asin deboto ngonian na Semana Santa.
Sa intrevista kan Bombo Radyo Naga kay PCMS Juan Batolina, PIO, Libmanan Municipal Police Station sinabi kaini na nakatutok an pulisya sa Maharlika Highway kun sain igwa ngunyan nin mga proyektong DPWH.
Apwera kaini, nakadeploy man nin seguridad sa mga centro kan banwaan asin mga simbahan, partikularmente sa mga aktibidad kan simabahan katakod kan Semana Santa. Pigkakarkulong posibleng rinibo an magduruman sa banwaan, kaya mahigot na pigbabantayan an dalagan kan trapiko.
Pig-aandam man an mga alternatibong agihan tanganing maibitaran an gabat kan trapiko sa tinampo. Alagad, aminado an pulis na kulang an mga behikulo huli sa halangkaw na presyo kan gasolina; sa ngunyan, mga traysikel sana an ginagamit bilang temporaryong serbisyo para sa nagkapirang operasyon.
Nagpagirumdom man an opisyal sa publiko na mag-ingat kun nagbibiyahe, nin huli ta padagos an mga proyekto sa tinampo, importante na maseguro na bako sana an mga behikulo kundi pati na an mga drayber an nasa marhay na kamugtakan tanganing maibitaran an mga aksidente.
