NAGA CITY – Maikokonsiderar na sarong ehemplo nin kabanalan an bagong talagang Millennial Saint kan Simbahang Katolika na si San Carlo Acutis sigun sa sarong Campus Minister.
Sa entrevista kan Bombo Radyo Naga ki Val Dominic Monit – Campus Minister, Ateneo de Naga Unversity, sinaysay kaini na pormal nang isinagibo an canonization ki St Carlo Acutis asin man St Pier Giorgio Frassati kan nakalihis na Dominggo, an mga ini an mga huben na katoliko sa Italya.
Sinda naghinguha na maipalakop asin maibalangibog an debosyon sa Banal na Sakramento.
Nagadan si St Acutis kan ini Grade 10 Student pa sana, alagad dakula an nagin impact sa tao huli na man ta ini an primerong Santo na digital relic o naggibo nin website manungod sa Eucaristic Miracles.
Ehemplo ini sa jovenes na dae imposible an kabanalan orog na ngunyan na panahon.
Sigun ki Monit, komo saro man na joven, naghahagad sinda sa nasambitan ng millenial saint na madara man ninda an mas kadakol pang jovenes parani sa relasyon sa Kaguranganan.
Sa presente, an nagigin nakataudan na kaya kan mga jovenes ngunyan iyo an inaapod na manefesting, alagad ini nagluluwas na kapareho kan man sana kan pagpangadyi.
Nagtutubod ini na tanganing magin banal an sisay man, kaipuhan na mahanap an katotohanan sa gabos na bagay siring kan katotohanan sa pagpadangat, karahayan nin gibo, asin an katotohanan sa pag laom.
Mientrastanto, kahagadan ni Monit na mahiling sa lambang mga jovenes an katotohanan na an eukaristiya bako sanang simbolo kundi ini mismo si Kristo na lawas, dugo, kalag asin bilog na pagkatawo Diyosnon asin tawo
