NAGA CITY– Nagpatutsadarahan sa Bombo Radyo Naga sinda 1st District Representative Rolando Andaya asin 2nd District Rep. LRay Villafuerte.
Katakod ini sa pagpapadumping kan provincial government sa tinampo na pig-aagihan kan mga residente kan Sitio Caorasan, Barangay San Agustin sa parehong banwaan.
Sa entrevista kan Bombo Radyo Naga ki Villafuerte sinasyay kaini na nangbugbog, nanipa, nangtilok asin nanutok pa nin patarom si Andaya sa mga miembro kan Sagip Kalikasan na nagsisirbing bantay sa pigigibong pagpadumping sa ugar.
Tulos man ining sinimbag ni 1st District Representative Rolando Andaya, kunsaen sigon sa opisyal, mayong katotoohan an mga akusasyon laban sa saiya imbes siya pa soboot an itinulod kan mga alalay ni Villafuerte mantang armado man nin pataraom an mga taga Sagip Kalikasan sa ibong kan Comelec gunban.
Enot digdi, anggot na nagtiripon gikan sa nasambitan ng lugar an mga residenteng apektado kan re-orientation project kan Naga Airport na nasa banwaan nin Pili.
Sigon sa sainda, nakubanan na sana sinda kan magtambad sa sainda an tambak na daga sa saindang pig-aagihan na tinampo.
Ini makalihis isugo soboot kan provincial government an pagdumping sa lugar na parte kan pagpapadagos kan nasambitan ng proyekto.
Pigsurog man kan alkalde kan banwaan na si Mayor Tom Bongalonta an mga residente asin sinabing sarong klase ini nin panghaharass mantang naghagad man nin tabang sa kaalyadong si Cong. Andaya na tulos man na nagpasiring sa lugar para personal na hilingon an sitwasyon.
Pasado alas-4 man suudma kan makaresibe nin report si Cong. LRay na may mga binugbog soboot asin kinulugan si Cong. Andaya na mga tauhan kan probinsya rason para tulos ining nagpasiring sa PNP para isumbong an pangyayari.
Alagad anggot man na nagduman sa istasyon kan pulisya an mga residente kaibanan sinda Andaya asin Bongalonta.
DUman na nagkasimbagan an duwang kongresista na tulos man na napugulan kan mga pulis.
Sa entrevista kan Bombo Radyo Naga sa duwang kongresista, dae napugulan kan mga ini na magribayan nin maiinit na tataramon sa kada saro.
