NAGA CITY- Naka-red alert na ngonyan an probinsya nin Camarines Sur huli sa posibleng epekto na darahon kan bagyong Agaton.
Basado sa ipinaluwas na Memorandum No. 2 ni Camarines Sur Gov. Miguel Luis ‘Migz’ Villafuerte, ipigsairarom na sa red alert status huli sa namamteang raot kan panahon an bilog na probinsya.
Inabisuhan man kan provincial government an gabos na mga Municipal Disaster Risk Reduction and Management Office (MDRRMO) na ipreparar na an mga contingency measures asin magtenir na nakaalerto katakod kan posibleng pagbabaha asin landslide sa manlaen laeng mga banwaan.
Mientrastanto, pighahandalan man kan MDRRMO-Buhi na magresulta sa pagbabaha sa banwaan nin Nabua asin sa nagkapirang mga low lying areas sa Rinconada area an nangyaring pag-overflow kan flood control structure kan National Irrigation Administration (NIA) sa nasambitang banwaan.
Katakod kaini, pigpapadoble ingat kan mga otoridad an mga nakaistar sa nasambitang lugar huli sa posibilidad kan pagbabaha katakod kan raot nin panahon.
