NAGA CITY- Mayong plano an dating alkalde kan banwaan nin Caramoan, Camarines Sur na magbalos sa mga persona na nagdudo kan saiyang pangaran sa kontrobersiyal na mega shabu laboratory na nadiskubre sa banwaan nin Virac, Catanduanes kan taong 2016.
Segun ki dating Caramoan Mayor Constantino Cordial, pigpapasakamot niya na sana sa Kagurangnan an mga masunod na posibleng mangyari saiya makalihis maabswelto sa kasong isinangat sa Department of Justice (DOJ.)
Dugang pa ni Cordial, mayo siyang plano na magbalos sa kun siisay man na mga darakulang persona na nagguyod sa saiyang pangaran sa nasambitang kontrobersiya.
Mientrastanto, segun sa dating alkalde, dae man nagtubod an nagkakapirang mga namamanwaan sa banwaan nin Caramoan na imbwelto siya sa transaksyon nin iligal na droga.
Enot kaini, ikinaugma ni Cordial an nasambitang desisyon kan DOJ.
