Binatikos ni Cardinal Pablo Virgilio David, Presidente kan Catholic Bishops’ Conference of the Philippines (CBCP), an kawarang pakiaram kan mga mayayaman sa tahaw kan pagtios kan kadaklan, asin inapod ining ugat kan korapsiyon.
Sa saiyang homiliya kasuodma, ginamit ni Cardinal David an istorya ni Lazarus gikan sa Bibliya tanganing ipahiling na bakong gutom o sakit an tunay na rason kan pagkagadan ni Lazarus, kundi an kawaran nin malasakit kan mayamang nasa gilid kaini.
Pigkumparar man kan cardinal an sitwasyon ni Lazarus sa mga Pilipinong nagtatrabaho nin husto alagad bakong bastante an kita para sa disenteng pamumuhay.
Tinuligsa man kaini an maluho asin bakong sensitibong pamumuhay kan nagkapirang nasa kapangyarihan siring kan pagkakaigwa nin 40 mamahalong lunadan, pagkakan na nagkakantidad nin P700,000 para sa apat na tawo, asin regalong singsing na nagkakantidad nin P50 million.
Pigtuyaw man kaini an mga politikong piggagamit an kwarta kan bayan para sa pansadiring interes asin sa mga ghost infrastructure siring kan flood control.
Katakod kaini, liwat nangapodan si Cardinal David sa mamamayan na manindugan kontra sa katiwalian.
Kan nakalihis na Setyembre 21, nag-iba ini sa “Trillion Peso March” kontra sa korapsiyon asin pig-enkaminar an gabos na magbali sa mga protesta.
