Pigheras kan tagapagtaram kan Casureco II an isyu dapit sa posibleng epekto kan paglangkaw kan konsumo nin kuryente lalo na sa panahon nin labi-labing init.
Sa intrevista kan Bombo Radyo Naga ki Renner Bucay, Spokesperson kan Casureco II, sinaysay kaini na posibleng magdoble o magtriple an nakokonsumo nin kuryente huli sa labi-labing init kan panahon o sa magigin epekto kan Super El Nino.
Segun ki Bucay na nakadepende sa supply asin demand an presyo kan kuryente. Kun an konsumo padagos na maglangkaw mantang limitado an supply, pwedeng magkawsa ini nin dagdag na presyo sa sektor nin enerhiya asin posibleng makaapektar sa taripa o mga babayaran kan mga konsumidor.
Alagad an pag doble asin triple kan aktwal na taripa sa kuryente dae pa sa ngonian, posible ining mangyari alagad bakong kabilogan huli an power rates nababanga sa kadakol na parte, arog kan generation, transmission, distribution charges, value-added tax o VAT, asin systems loss charge, kaya posibleng maglangkaw base sa parte na maaapektaran kan taripa.
Mientrastanto, dae man sinda kontra sa pag laag kan solar panel, huli sarong parte ini kan renewable energy na pwedeng pag kuanan kuryente asin dakulang tabang ini lalo na sa panahon ngunyan na tag-init.
