Dakulang tabang an paghali kan tax sa system loss na saro sa mga binabayadan kan mga consumer.
Sa intrevista kan Bombo Radyo Naga ki Engr. Rinner Bucay, an Spokesperson kan CASURECO II.
Sigon digdi, duwang klase an inaapod na system loss, an technical na normal na nawawarang kuryente sa oras na mag-energize an mga planta kan kuryente antes makaabot an suplay sa mga kaharungan o sa mga consumedores asin panduwa ining non-technical na digdi na naglalaog si mga hinabunan nin kuryente kabali na an mga street lights kan mga Barangay asin naka install na CCTVs sa mga Barangay na saro man sa dinadalaganan kan kuryente.
Dagdag pa ni Bucay, dakulang maray na tabang an hahalion na tax alagad kun an mismong an system loss an hahalion, dakulang angat ini sa cooperatiba asin kaipuhan ining pag-adalan na maray.
Mientrastanto, dakulang kahaputan kun isay an maako kan bayadan sa mga nawawarang kuryente huli ta kadakol man an pinagkakagastusan kan kooperatiba kabali na an maintenance, mga sanglian na poste, raraot na trasformer asin iba pa.
Paabiso na sana kan opisyal na ibitaran an paghabon nin kuryente huli ta dai sinda mauntok sa pagdakop kan mga ini asin desidido sindang kasuhan an siisay man na mapapatunayan na naghahabon nin kuryente.
