NAGA CITY- Pantolo sa may pinakahababang residential rate on grid sa bilog na Pilipinas an Casureco II.
Sa entrevista kan Bombo Radyo Naga ki Rinney Bucay, Spokesperson kan CASURECO II, nagtao ini nin pagbati sa mga member/consumer owners kan CASURECO II, asin man sa saindang board and management kun saen nakabali an CASURECO II na nag-pantolo na may pinakahababang singil sa kuryente kan nakaaging Pebrero 2024.
Piglalaoman man kaini na liwat makakabali an CASURECO II asin makukua an pinakaenot na pwesto nin huli ta ngunyang na Marso, nagluwas na an saindang bagong power rates sa residential, na nagkakantidad nin ₱5.2137 kada kilowatt hour, sa low voltage man ₱4.3384 kada kilowatt hour, asin man sa high voltage nasa ₱3.1647 kada kilowatt hour. Boot soboot kaini, hababa an saindang singil ngunyang bulan, asin dakula an posibilidad na saindang makua an primerong pwesto sa pinakahababang singil sa kuryente sa entirong nasyon.
Sigun ki Bucay, an rason kan pagbaba kan kuryente an huli ta hababa an saindang nababakal na kuryente gikan sa saindang mga power suppliers, kun saen saro igdi an Wholesale Electricity Spot Market(WESM) na nagsusupply sa saindang kooperatiba na may hababa na singil. Dugang pa ni Bucay na naghahanap an saindang board and management nin supplier nin kuryente na may hababa na presyo kun saen maswerte soboot na nakua ninda ini sa Power Sector Assets and Liabilities Management Corporation (PSALM).
Apwera pa digdi, an saindang pag-implementar kan pigpaluwas na resolution #14 series of 2022 gikan sa Energy Regulatory Commission, an computation kan saindang adjustment manunungod sa overland direct offering na pigsusunod kan CASURECO II. Asin enkaso man sobot magkaigwa nin adjustment, tulos man ninda ining pinapautob.
Kun hihilingun man an saindang power rates talagang hababa soboot ini kumparar kan mga nakaaging bulan.
