Pigsugo ni Presidente Ferdinand Marcos Jr. an Department of Public Works and Highways (DPWH) na tolos simbagan an kakulangan sa mga classrooms sa bilog na nasyon, makalihis mabuyagyag na 22 classrooms pa sana an naitindog kan ahensya ngunyan na taon.
Sigun ki Palace Press Officer Claire Castro, pigpapaimbestigaran na kan Presidente kun tano bakong marekas an proyekto asin pigsugo si Secretary Vince Dizon na magibo nin catch-up plan tanganing maparekas an konstruksyon kan mga classrooms.
Pigsierto kan palasyo na kun igwang mapatotoohan na kapabayaan o kakulangan kan mga opisyal na responsible, sinda man an mapapanimbag.
Kaibahan sa plano kan administrasyon an pakikipagtabangan sa mga lokal na gobierno tanganing maparekas an proseso.
Mientrastanto, katakod kan pangapudan ni Senator Bam Aquino na ideklarang urgent an Classroom Building Acceleration Program, pigsaysay kan Malacañang na dae pa narereseber kan Office of the President an prosopwestong ley, alagad namamantenir na primerong prayoridad kan administrasyon an solusyon sa kakulangan kan mga classrooms sa nasyon.
