Nagdara liwat nin onra an CBSUA Chorale pagkatapos na ini manggana nin ikaduwang pwesto sa sarong nasyonal na kompetisyon sa pagkanta.
Sa intrevista kan Bombo Radyo Naga kay Cris Caryl Yu (Choir Director/Conductor, CBSUA-Chorale), sinabi kaini na dae ninda piglalaoman an nasabing kapangganahan urog na bago pa sana an saindang grupo na igwang tolo sagkod apat na taon na eksperyensya. Dugang pa kaini na mas matibay an kompetisyon sa laog kan nasyon huli sa kadakulan kan mga talentadong Filipino choirs.
Ipinahayag man kan direktor na an disiplina iyo an mayor na susi sa saindang kapangganahan. Mas importante suboot an tamang ugali asin dedikasyon kan lambang miyembro kaysa sa natural na talento sa pagkanta. An mga miyembro pigpapairarom sa lubos na pagsasanay kabali an mga pag-ensayo sa laog kan harong, mga pisikal na aktibidad, asin sarong estriktong iskedyul tanganing mapauswag an saindang mga kakayahan asin karakter.
Aminado man an liderato na nagkaigwa sinda nin nagkapirang agyat arog kan kakulangan nin mga miyembro, limitado an panahon sa pag-andam, asin nagkapirang problema sa pinansyal. Alagad, nalampasan ninda ini sa paagi nin kooperasyon, suporta kan eskwelahan, asin mga aktibidad sa pagtipon nin pondo arog kan mga konsyerto asin pag-caroling.
Mientrastanto, pigduon man kan direktor an kahalagahan kan musika bilang paagi nin pagkasararo, mantang nagpapahayag man nin pag-orgulyo sa kakayahan kan mga Pilipino sa lado kan choral singing.
Sa ibong kan serye nin mga kompetisyon ngonian na taon, plano kan grupo na magkondusir nin mga workshop tanganing matabangan an iba pang mga nagmamawot na magin koro. Nagpaabot man nin pasasalamat an grupo sa saindang liderato, mga magurang, asin sa gabos na nagsuporta sa saindang kapangganahan.
