Preparado an City Disaster Risk Reduction and Management Office (CDRRMO) kan Ciudad nin Naga para sa mahigot na seguridad asin kaligtasan durante kan Fluvial Procession na gigibohon sa Sabado, bilang parte kan Peñafrancia Celebration.
Sa intrevista kan Bombo Radyo Naga ki Raynor Rodriguez – Head, CDRRMO-Naga, sinabi kaini na an mga preparasyon nakabase sa Incident Action Plan kan Incident Management Team (IMT), na ginibo sa pakikipagtabangan kan Philippine National Police, Philippine Coast Guard, Bureau of Fire Protection, City Health Office, Public Safety Office, asin iba pang partner agencies.
Mahigpit man na ipapautob an pagkontrol kan mga sakayan pandagat. An mga bangka sana na kabali sa opisyal na manifesto kan Simbahan an tutugutan na magpartisipar, mantang an Philippine Coast Guard iyo an mamamahala sa paglaog asin paghiro kan mga sakayan pandagat tanganing maibitaran an overloading asin congestion sa salog.
An mga medical team, rescue boat asin ambulansya nakatutok man sa mga estratehikong lugar poon sa Peñafrancia Avenue sagkod sa Basilica. Yaon an mga plano sa emerhensia enkaso magkaigwa nin maraot na panahon o iba pang emerhensya.
Hagad ni Rodriguez sa mga deboto asin turista na unahon an kaligtasan—ibitaran an pagbali sa Traslacion kun may helang o mayo nin medical clearance, magdara sana nin mga esensyal na bagay, magsulot nin komportableng bado asin sapatos, asin ipasulot nin name tag asin contact number an mga aki.
Katuyuhan kan mga lakdang na maseguro an mahiwas, ligtas, asin matoninong na pag-uulay kan Fluvial Procession ngonian na Sabado.
