Ipighiras kan City Disaster Risk Reduction and Management Office (CDRRMO) kan Naga kan importanteng papel kaini sa pagpreparar asin pag-implementar kan safety and emergency measures para sa pagpoon kan 2026 Bar Examination sa ciudad.
Sa intrevista kan Bombo Radyo Naga ki Raynor Rodriguez – Head, CDRRMO-Naga,sinaysay kaini na an Incident Management Team (IMT) an ipinasairarom sa command kan operasyon kan Bar Examination ngani na maseguro an mas marhay na organisasyon asin mas marikas na koordinasyon sa manlaen-laen na opisina asin ahensya.
Kabali sa IMT an mga representante hale sa Philippine National Police (PNP), Bureau of Fire Protection (BFP), Philippine Coast Guard (PCG), asin manlaen-laen na lokal na opisina kan gobyerno, kabali na an CDRRMO.
Ipinaliwanag ni Raynor na importante an IMT na magkaigwa nin sarong sistema nin komunikasyon asin malinaw na responsibilidad kan lambang ahensya. Kabali man sa Incident Action Plan an mga kinakaipuhan na lakdang tanganing maseguro an kaligtasan kan mga examinees, examiners, staff, asin iba pang tawo na imbuelto sa Bar Examination.
Kabali sa mga preparasyon an seguridad sa lugar, koordinasyon kan paglaog kan mga eksaminado, pamamahala kan trapiko, asin an pagtogdok nin mga tolda bilang proteksyon laban sa uran asin iba pang posibleng mga pagkadisturbo.
An total na pwersa na nakadestino sa IMT para sa Bar Examination uminabot sa halos 200 na personahes, apwera pa kan iba pang support personnel hale sa manlaen-laen na ahensya.
Mientrastanto, sa intrevista pa kan Bombo Radyo Naga ki Neil Aaron B. Cabida Pio- IMT Bar 2026, sinaysay kaini na mahigot na seguridad an pigpapaotob sa University of Nueva Caceres (UNC) komo testing center para sa 2026 Bar Examinations sa Setyembre 6. Segun sa Incident Management Team (IMT), an mga examinees nagpoon na mag-abot bandang alas 7 nin aga hale sa manlaen-laen na parte kan Bicol Region asin pagtaraid na lugar.
Pigkakarkulong maabot sa 200 na personahes hale sa PNP, BFP, Philippine Coast Guard, asin City Government of Naga an nakadestino para sa seguridad asin emergency response. An pagsara kan tinampo nagpoon kan alas 9 nin banggi. kan Setyembre 5, mantang an IMT lubos nang nag-ooperar kan mga alas 2 nin aga.
Mahigot na ipinagbabawal an paglaog kan mga sibilyan sa testing center tanganing dae maistorbo an mga examinees. Hagad man kan IMT an pagsabot kan publiko sa ipinapaotob na pagsara kan tinampo asin inaabisuhan an mga motorista na gumamit nin alternatibong ruta arog kan General Luna.
