NAGA CITY- Padagos na nakamonitor an City Disaster Risk Reduction and Management Office Naga sa sitwasyon sa siyudad katakod kan pigbabantayan na raot kan panahon.
Sa entrevista kan Bombo Radyo Naga ki Raynor Rodriguez, pamayo kan City Disaster Risk Reduction and Management Office Naga, sinaysay kaini kasabay kan namamatean na pabugso-bugsong pag-uran sa siyudad, nagpa-abot na soboot sinda nin mensahe sa Barangay Disaster Risk Reduction Management Council na magpreparar asin dae magin kampante da kamugtakan kan panahon.
Sigun pa sa opisyal, nag-ikot an saindang mga personahe sa mga pangenot na tulay kun saen pig-check si lebel kan tubig.
Katakod digde, normal man soboot an gabos asin mayo man sa kritikal na lebel an tubig.
Dugang pa ni Rodriguez, mahigot soboot an kasuguan ni Naga City Mayor Leni Robredo na pirmeng magpautob nin precautionary measure tanganing masierto an kasalbaduhan kan publiko.
Mientrastanto, pigsaysay man ni Pol Agna, Admin and Training Assistant kan Coast Guard Sub-station Camaligan, na padagos soboot an siandang monitoring sa lebel kan tubig sa Camaligan River tanganing malikayan an anuman na katibadaan.
Pigsierto man kan opisyal na mayong pig-ibakwar na mga residentes asin mayong pagbaha na naikurot sa saindang lugar huli ta light to moderate rain man sana an nararanasan sa saindang area.
Alagad padagos na nakabantay an saindang mga personahe asin padagos an pag-abiso sa mga residentes na magin updated sa kamugtakan kan panahon para sa saindang kasalbaduhan.
