Magigin epektibo an ceasefire deal sa pag-ultanan kan Israel asin Hamas sa aldaw nin Domingo, Enero 19 makalihis nin labing sarong taon na gera sa pag-ultanan kan Israel asin Hamas sa Gaza poon kan ini magsiklab kan Oktubre 7, 2023.
Ini an enot na yugto kan kasunduan na madurar sa 6 na semana o labi sa sarong bulan.
Sa irarom kan yugtong ini, ipapairal an ceasefire, pag-withdraw kan Israeli forces, ribayan o pagpapalibre nin mga hostages asin preso sa lado kan Israel asin Hamas asinman an pagbulos nin humanitarian aid sa Gaza.
Pigsaysay ni Presidente Joe Biden kan Estados Unidos kan Miyerkules na an mga Amerikanong nasyonal na nabihag sa Gaza kabali sa mga papalibrehon.
An ikaduwa asin ikatolong yugto mayo pang siring na malinaw na detalye asin nakatalaan na desisyonan sa enot na yugto kan kasunduan.
Dawa ngani an kasunduan sa untok-putakan dati nang kinumpirmar kan mga mediators na Qatar asin kan Estados Unidos, an gabinete kan Israel asin si Primer Ministro na si Benjamin Netanyahu nakatalaan pa sanang aprubaran an kasunduan.
Dae man soboot matao pa nin opisyal na komento si Netanyahu hasta sa dae pa naisasapinal an mga detalyes sa ceasefire deal.
Sa lado man kan Hamas, sinabi ni Hamas official Izzat al-Risheq na nasunod gabos nin mga inilatag na kondisyon kan Palestinian group sa napag-ulayang ceasefire deal sa Doha, Qatar kabali an full withdrawal kan Israeli forces, an pagbabalik nin mga na-displace na Palestino sa saindang mga istaran asin permanenteng pagtatapos kan giyera.
Mientrastanto, kasunod kan ceasefire asin hostage deal sa pag ultanan kan Israel asin Hamas, naka-ulay ni Prime Minister Benjamin Netanyahu sinda US President Joe Biden asin man US President-elect Donald Trump.
Digde, pinasalamatan ni Netanyahu si Biden sa saiyang suporta tangani maparikas an pagpapalibre sa mga hostages asin sa pagtabang sa Israel na mawakasan an pagsasakit kan dose-dosenang mga hostages siringman kan saindang mga pamilya.
Pig-omaw man ni Netanyahu si Trump sa saiyang pahayag na makikipagtabangan an US sa Israel tangani na siertuhon na dae magigin kanlungan para sa terorismo an Gaza.
Nagkasundo man sinda Trump asin Netanyahu na maghilingan sa futuro sa Washington tangani na pag-ulayan an nasambitan ng isyu asin iba pang importanteng urulay.
Pinagtibay man ni Netanyahu an commitment kan Israel sa pag-asegurar sa pagpapalibre nin mga hostages sa gabos nin posibleng paaagi.
Mantang, sa deklarasyon kan ceasefire, nagtrayumpo an mga Palestino sa Gaza strip. Nagkapira, mangiyak-ngiyak pa sa kaogmahan, sumisipol, nag-oopak asin nagkakanta nin “Allahu akbar” (God is greatest).
