Padagos na nag-aagda an City Environment and Natural Resources Office o CENRO sa publiko na magtipid nin tubig asin sinisigurado na igo pa an suplay kaini hale sa groundwater.
Sa intravesta kan Bombo Radyo Naga ki Marvin J. Segun, hepe kan City Environment and Natural Resources Offices, sinabi niyang suportado niya an pagsala kan tubig-uran bilang solusyon sa El Niño.
Alagad, kaipuhan na masunod an mga pamantayan sa seguridad antes ideklarar na ligtas inumon an tubig.
Dugang pa niya, sa panahon nin krisis, mas marhay na pakuloan an tubig bago inumon tanganing malikayan an mga helang arog kan cholera asin diarrhea.
Dai man niya sinusuportahan an pag-iimbak nin dakul na tubig huli sa posibleng kontaminasyon nin microplastics.
Sa presente, nakikipagtabangan an CENRO sa Naga Water District sa pagpaabot nin impormasyon manungod sa wastong pagtitipid nin tubig.
May ordinansa man na nag aagda sa mga pribadong sektor na magkabit nin rainwater harvesting facilities tanganing mabawasan an epekto kan El Niño asin an gastos kan lokal na gobyerno.
Sa katapusan, sinigurado ni Sagun na an El Niño makakabawas sana sa suplay nin tubig, alagad dai ini lubos na mawawara.
