Pigrekomendar kan City Environment and Natural Resources Office (CENRO) kan Ciudad nin Naga an paggamit nin suction dredgers, flood gates asin pumping station sa mga mall na parsial na sakop kan Sagop Creek nganing masimbagan an siltation asin mabawasan an pagbaha sa Barangay Triangulo.
Sa intrevista kan Bombo Radyo Naga kay Marvin Sagun – Acting City Environment and Natural Resouce Officer, sinaysay kaini na poco mas o menos 100 metros kan agihan nin tubig sa lugar an sakop kan sarong mall, mantang an ibang seksyon kan agihan nin tubig sakop kan saro pang establisimiento.
Paliwanag ni Sagon, an Barangay Triangulo asin parte kan Concepcion Pequeña dati nang madaling bahaon, alagad mas nahaloy an pagtipon asin pagbaba kan tubig makalihis an paggibo nin mga istruktura sa ibabaw kan mga agihan nin tubig. Naobserbaran man an siltation sa laog kan natatahoban na sistema nin kanal huli sa limitadong access para sa regular na paglinig. Sa rason na ini, irinerekomendar kan CENRO an pagpadakula kan mga manhole asin paggamit nin mga suction dredger tanganing mahale an natipon na laboy asin sediment.
Katakod kaini, hinagad kan CENRO sa mga manehamiento kan mga mall na magbugtak nin mga pumping station asin flood gate, siring man nin detention pond na labi sa 5,000 metro kwadrado tanganing temporaryong makatipon nin tubig bago iluwas sa Bicol River. Sigon ki Sagon, igwa nin mga kondisyon sa saindang mga permit na nakasurat na dai dapat magcausa nin pagbaha an saindang mga istruktura sa Barangay Triangulo, kun kaya kaipuhan na maotob ini bago matapos an taon.
Nagpatanid man si Sagon na posibleng isasairarom sa pagrepaso an mga permits asin permit to operate kan mga establisimiento enkaso dae makasunod sa itinalaan na kondisyon. Kasabay kaini, sinabi kaini na igwa pang ibang mga subdibisyon, residential asin commercial areas sa Naga na naireport na nag-encroach sa waterways, kabali na an sarong subdivision sa Barangay Pacol na ipinasa na sa Department of Environment and Natural Resources (DENR) para sa magkakanigong aksyon.
Mientrastanto, pig-aadalan kan ciudad an pag-revitalize kan nagkapirang lumang agihan nin tubig asin an pagmukna nin mga dagdag na agihan pasiring sa Bicol River tanganing mabawasan an pressure sa Sagop Creek. Nangapudan man an CENRO sa publiko asin mga kagsadiri nin negosyo na dai mag-apon nin basura sa mga sapa asin agihan nin tubig, asin papagdanayon na bukas asin malinig an mga natural na agihan nin tubig tanganing makatabang na malikayan an pagbaha.
