Pinapakusog kan City Environment and Natural Resources Office (CENRO) kan Ciudad nin Naga an preparasyon para sa maabot na Fluvial Procession bilang parte kan Peñafrancia Festival.
Sa intrevista kan Bombo Radyo Naga Ki Christopher Jhun D. Zantua – Senior Environmental Management Specialist, Cenro-Naga, sinaysay kaini na pinapakusog kan CENRO Naga an pagpepreparar asin paglinig sa Naga River bilang preparasyon sa maabot na Fluvial Procession kan Peñafrancia Festival, kaiba an mahigot na pagmonitor sa kaligtasan asin kalinigan kan salog.
Segun ki Zantua walong personahes an naka-assign sa Naga River para sa padagos na pag-monitor asin paglinig kan mga basura asin ati.
Nagkondusir man nin inspeksyon an IMT sa ruta kan prusisyon ngani na maseguro an kaligtasan kan mga sasakyang-pansalog, kaiba na an kondisyon kan tubig, sulog, rarom asin pag-alon.
Nagdistribwir man nin garbage bags an CENRO sa mga residentes na nakaistar sa mga lugar na aagihan kan prusisyon tanganing maibitaran an pagtapok nin basura sa salog.
Mahigot na ipinagbabawal an pagkarigos o paglangoy sa Naga River, siring man an pag-inom nin arak, pagdara nin matarom o madaling masulo na bagay asin badil sa mga behikulo na mapartisipar sa prusisyon. An mga sakayan dapat man na nakalista sa manifesto asin magsunod sa itinaong pormasyon asin espasyo.
Padagos man an pagmonitor kan Environmental Management Bureau sa kalidad kan tubig kan Naga River kada quarter.
Nangapudan si Zantua sa mga deboto, residente asin turista na mantiniron an kalinigan, dae mag-apon nin basura sa salog asin makikooperar sa ligtas asin areglado na selebrasyon kan Fluvial Procession.
