Inamin ni Centerways Construction and Development Inc. president Lawrence Lubiano na nagtao ini nin ₱30 million na campaign donation para ki Senador Chiz Escudero kan nakalihis na 2022 elections.
Ini an dawa pa igwa nin nag iiral na kontrata an saiyang kompanya sa gobyerno magpuon pa kan nakalihis na 2009.
Sa pagdangog kan House Infra Comm, pighapot ni Akbayan Party-list Rep. Chel Diokno si Lubiano dapit sa mga kontratang kapot kan Centerways, partikularmente sa Bicol region kun saen labi sa 30 proyekto an nasa Sorsogon.
Kinumpirmar ni Lubiano na haloy nang nakakabali sa mga government projects an saiyang kompanya magpuon pa kan nakalihis na taong 2009 asin nakapagrehistro nin mga proyekto sa Albay, Camarines Sur, Cebu asin man Masbate.
Pag-aamin ni Lubiano magpuon 2022 hasta man sa presenteng taon, nasa 80 proyekto an saindang na-bid. Paglilinaw pa man ni Lubiano na personal donation an itinao ki Escudero asin man bako gikan sa saindang kompanya.
Basado pa sa Section 95 letter C kan Omnibus Election Code, ipinagbabawal an mga government contractor kan gobyerno na magtao nin donasyon sa mga kandidato.
