Tinawan-duon kan CHED Bicol an libreng matrikula sa SUCs asin LUCs, monitoring asin reklamo kan mga estudyante, pinaiigting.
Sa intrevista kan Bombo Radyo Naga ki Dr. Demetrio Pascua Anduyan Jr. – Regional Director, Commission On Higher Education – Bicol, ipig-esplikar kaini na sa iraraom kan Republic Act No. 10931, o Universal Access to Quality Tertiary Education Act, libre an pag-adal sa kolehiyo para sa mga kwalipikadong estudyante sa mga Local Universities and Colleges (LUCs) asin State Universities and Colleges (SUCs), na sakop an libreng tuition fee asin an (13) miscellaneous fees. Alagad, may iba pang bayadan na dai sakop kan nasambit na 13 miscellaneous fees na puwedeng ipataw kan institusyon, pero kinakaipuhan na maaprubahan kan Respective Governing Boards antes ini maipatuman asin masingil sa mga estudyante.
Tgsierto man an tamang pagpapatuman sa paagi kan monitoring scheme asin pagiging bukas na linya nin komunikasyon para sa mga estudyante sinisingil nin ano man na bayadan na dai kabali sa mga pinapahintulutang fees.
Segun ki Anduyan, puwedeng makipag-ugnayan an mga estudyante paagi kan email o mensahe kun makaeksperyensiya kan nasambitang isyu. Katakod kaini, nagsasagibo man an opisina nin angay na aksyon sa paagi man kan pagpapadara nin mga staff sa mga eskwelahan hali sa opisina tanganing magsagibo nin monitoring, makipagdayalogo sa mga estudyante, asin atubangon an mga compliants kan mga estudyante.
Kadakul man nin mga scholarship program, arog na lamang kan Tertiary Education Subsidy (TES) asin Tulong Dunong Program (TDP), kun sain obheto kaini an makatabang asin magsuportar sa mga estudyante, partikular sa mga nangangaipuhan nin dugang na pinansyal na tabang para sa saindang pag-adal.
Padagos man na tig-eenkaminar kan CHED Bicol an mga estudyante na magpaabot nin saindang mga reklamo, suhestiyon, o ano man na concern, tanganing ini maagap na matutukan asin matawan nin angay na aksyon.
