Nakaenkwentro an mga sakayang pandagat kan Philippine Coast Guard (PCG) asin Bureau of Fisheries and Aquatic Resources (BFAR) nin sunod-sunod na harassment hale sa Chinese Coast Guard (CCG) mantang ginigibo an saindang misyon na maghatod nin fuel subsidy sa mga parasira sa Bajo de Masinloc kan aga kan Hulyo 24.
Segun sa report, pasiring sa nasambitan ng lugar an mga personahes kan PCG asin BFAR para magdistribwer nin ayuda na para sa mga Filipinong parasira na padagos na nagsasarig sa pagsisira bilang saindang kabuhayan. Katuyohan kan fuel subsidy program na mabawasan an gastos kan mga parasira sa saindang operasyon, orog na huli sa padagos na paglangkaw kan presyo kan lana asin iba pang pangangaipo sa pagsira.
Mantang piggigibo an humanitarian asin livelihood assistance mission, sinasabing sinabat kan mga sakayan kan CCG an mga sakayan kan PCG asin BFAR asin ginibo an mga aksyon na pigkokonsiderar na harassment asin obstruction sa saindang paglayag.
Sa ibong kan insidente, padagos man giraray an trabaho kan mga tauhan kan gobyerno tanganing maseguro na makaabot an ayuda sa mga Pilipino na parasira. Padagos man na pigbabantayan kan PCG an sitwasyon sa kadagatan tangarig na mamantenir an kaligtasan kan mga personahes asin benepisyaryo kan programa.
Pigduon kan mga awtoridad na an paghatod nin ayuda sa mga parasira parte kan mandato kan gobyerno na protehiran an kabuhayan kan mga Pilipino asin maseguro an padagos na suporta sa mga komunidad na nagsasarig sa yaman sa kadagatan.
An Bajo de Masinloc, bisto man sa apod na Scarborough Shoal, sarong importanteng lugar sa Sulnupan na Dagat Filipinas na mahalaga sa mga parasira na Filipino huli sa mga yamang dagat na makukua duman. Alagad, padagos ining nagiging sentro nin tensyon huli sa manlaen-laen na paghihingako kan ibang nasyon sa nasabing kadagatan.
Sa mga nakalihis na taon, may naitala na mga insidente nin tensyon asin komprontasyon sa lugar sa pag-ultanan kan mga sakayan pandagat kan Pilipinas asin Tsina. Matapos kaini, padagos an pangapudan kan gobyerno kan Pilipinas na magsunod sa ley internasyunal asin mantinir an orden asin kaligtasan sa kadagatan.
Mientrastanto, pigsierto kan PCG asin BFAR na magpapadagos an saindang operasyon tangarig na matawan nin kinakaipuhan na suporta an mga parasira na Pilipino asin mamantenir an presensya kan gobyerno sa mga kadagatan na sakop kan nasyon.
