Mayo pa nin nakukua na kumpirmasyon an Department of National Defense (DND) kun matungod an China sa ika-20 ASEAN Defence Ministers’ Meeting (ADMM) na gigibuhon sa Lapu-Lapu City, Cebu poon ngonyan na aldaw, Oktubre 28 sagkod 29, 2026.
Segun ki DND Assistant Secretary Arsenio R. Andolong, an ADMM an nagtutukdo bilang pinakahalangkaw na lebel nin mekanismo para sa konsultasyon asin kooperasyon sa lado nin depensa sa bilog na rehiyon kan ASEAN.
Kapot kan Pilipinas ngunyan na taon an pagkapangulo kan ika-20 ADMM asin ika-13 ADMM-Plus sa irarom kan pamamayo ni Defense Secretary Gilberto C. Teodoro Jr. na may temang “Navigating Our Future Together.”
Kaiba sa ADMM-Plus an walong dialogue partner na Australia, China, India, Japan, New Zealand, South Korea, Russia, asin Estados Unidos.
Piglalaoman man sa pagtiripon an pormal na pakikipag-ulay kan mga ministro nin depensa sa Japan asin Estados Unidos, apuwera pa sa manlaen-laen na bilateral meetings sa gilid kan mga pangenot na sesyon.
Pormal man na ipapasa kan Pilipinas an pagkapangulo kan ADMM asin ADMM-Plus sa Singapore ngunyan na Huwebes, Oktubre 29, tanganing ipagpadagos an pagtulod kan katuninongan asin seguridad sa rehiyon kan Indo-Pacific.
