Inaprubahan ng National People’s Congress ng China ang isang batas na nagtataguyod ng “ethnic unity,” na ayon sa mga human rights group ay maaaring lalo pang magpalala sa marginalization ng mga minority groups sa bansa.
Ayon sa bagong batas, magiging obligasyon ng mga paaralan na ituro ang Mandarin bilang pangunahing wika ng edukasyon at pampublikong gawain, at kinakailangang may “basic grasp” ang mga kabataan sa Mandarin bago matapos ang kanilang compulsory education.
Nakasaad din sa batas na maaaring ipatupad ito kahit sa labas ng China, kung saan ang sinumang “umaksiyon laban sa ethnic unity” o nag-eencourage ng “ethnic separatism” ay maaaring managot sa batas.
Habang hindi tinukoy ng batas ang mga partikular na minority languages, inaasahang maaapektuhan nito ang mga Uyghur, Mongolian, at Tibetan speakers. Binibigyang-diin din ng batas ang kriminalisasyon ng “violent terrorist activities, ethnic separatist activities, o religious extremist activities.”
Ang layunin umano ng gobyerno ay “palakasin ang cohesion” sa China bilang tugon sa tinatawag nitong unprecedented social changes. Sa ilang lugar na may malaking populasyon ng minority, gaya ng Tibet at Inner Mongolia, naging mandatory na rin ang Mandarin bilang wikang panturo.
Ayon kay Maya Wang, Deputy Asia director ng Human Rights Watch, ang batas ay hindi nakatuon sa tunay na pagkakapantay-pantay, kundi sa pilit na assimilasyon ng mga minority, at maaaring hadlangan ang karapatan ng mga bata na matutong magsalita ng dalawang wika.
