Desperado na suboot an China asin an Chinese envoy sa pagpapakuriyat nin sala asin pekeng impormasyon manungod sa West Philippine Sea.
Segun ki Philippine Coast Guard Spokesperson for the West Philippine Sea, Rear Admiral Jay Tarriela, sunod-sunod na an ginigibong pagpaluwas kan Chinese Embassy in Manila nin salang impormasyon komo parte kan disinformation campaign para suportahan an saindang pangangamkam sa pinag-aagawang kadagatan.
Binalikan ni Tarriela an suboot panraraot sa saiya ninda Chinese Ambassador to the Philippines Jing Quan asin Deputy Spokesperson kan Chinese Embassy na si Guo Wei,komo saro sa pinakamakusog na boses kan Pilipinas sa mga isyu manungod sa West Philippine Sea.
Segun saiya, pig-uungkat kan mga ini an saiyang dating paggamit nin mga satirical image asin pigpipirit na binastos kaini si Chinese President Xi Jinping.
Alagad segun ki Tarriela, an naturang mga imahe dai pa man maikumpara sa lawak kan pambubully kan China, sa pangangamkam kaini sa mga teritoryo kan Pilipinas sa West Philippine Sea, asin sa iba pang harassment activities laban sa mga Pilipino.
Mientrastanto, kasunod kan diskusyon ninda ni Senador Robin Padilla manungod sa kontrobersiyal na racist video na ipinaluwas kan Chinese state media, sinabi ni Tarriela na dai pa sinda personal na nagkaolay kan senador.
Mayo man suboot sindang personal na alitan ni Padilla, alagad dai ini sang-ayon sa pahayag kaini manungod sa naturang video, kaya kinakaipuhan kwestyonon kaini. Naglalaom man si Tarriela na naintindihan kan senador an saiyang posisyon pagkatapos kan saiyang pagtao nin mga pagpapaliwanag.
