Nagsagibo nin peligruso na pag ulang an fighter jet kan China sa aircraft kan Philippine Coast Guard (PCG) sa papawirin kan Panatag Shoal (Scarborough Shoal) kan nakalihis na aldaw, Agosto 13.
Sa sarong statement, sinabi ni PCG spokesperson for the West Philippine Sea (WPS) Commodore Jay Tarriela na nagsagibo nin delikadong pagbuntot an PRC J-15 fighter aircraft sa PCG Caravan aircraft na may lunad na mga kawani kan media sa laog kan labi sa 20 minuto na nasa 500 feet sana an rayo asin nag agi pa nin direkta sa ibabaw na 200 feet sana an agwat.
Nakaengkwentro man an PCG aircraft nin limang radio challenge gikan sa People’s Liberation Army (PLA) Navy vessel 553 mantang sinundan man nin PLA Navy warship 568 an duwang US Navy vessels na nanutaran man sa lugar.
Sigun ki Comm. Tarriela, ini na an primerong pagkakataon ngunyan na taon na nakaengkwentro nin PCG patrol aircraft sa ere an sarong Chinese fighter jet.
Enot digde, idineploy kan PCG an aircraft tangani matukoy kun nasa lugar pa an naraot na China Coast Guard (CCG) vessel 3104 makalihis an banggaan.
Alagad, kinumpirmar ni Comm. Tarriela na dae na nanutaran sa Panatag Shoal an.presensiya kan PLA Navy vessel 164 na imbwelto sa collision incident kan nakalihis na Lunes.
Idineploy man an aircraft kan Pilipinas tangani magsagibo nin maritime domain awareness flight sa Panatag Shoal na obhetong imonitor asin siertuhon an kasalbaduhan kan mga parasisirang Pilipino na nagsisira sa lugar.
