Nangangapodan an Commission on Human Rights (CHR) sa mga bagong elihir na lehislador sa papaabuton na 20th Congress na tawsn-prayoridad an pagpasar kan duwang propwestong ley na obhetong itaguyod an derichos kan LGBTQIA+ community, kasabay kan pagselebrar kan pride month ngunyan na bulan nin Hunyo.
Sa sarong pahayag kan Biyernes, tinawan-duon kan CHR an importansya kan sexual orientation, gender identity, gender expression, or sex characteristics (SOGIESC) equality bill asin kan comprehensive anti-discrimination bill (CADB) komo kasimbagan sa padagos na diskriminasyon asin dae pagkapantay-pantay na naeksperyensiyahan kan LGBTQIA+ sector sa nasyon.
Napag-araman na haloy nang nakabinbin sa Kongreso an SOGIE asin anti-discrimination bills, na madalas nahaharang huli sa pagtutol kan pirang lehislador na konserbatibo asin mga grupong relihiyoso.
Marurumdoman, taong 2022, inaprubaran kan Senate Committee on Women sa pangengenot ni Senador Risa Hontiveros an sarong bersyon kan SOGIE bill, alagad dae na ini nag-usad.
Sa panahong idto, inakusaran pa ni Hontiveros an sarong kapwa senador nin pagtatapa sa propwesto.
Naglalaom an CHR na an bagong mga lehislador an mapuon sa mas inklusibong pananaw asin magtaong-duon sa pagpasar kan mga ley na nakaugat sa prinsipyo kan humanos derichos, pagkakapantay-pantay, asin hustisya.
