Preparado na an Coast Guard Station Camarines Sur para sa pagdagsa kan mga biyahero ngunyan na Semana Santa, matapos mag-deploy nin karagdagang personnel an Coast Guard District Bicol tanganing mapakusog pa an seguridad asin kaligtasan sa mga pantalan asin coastal areas.
Sa intrevista kan Bombo Radyo Naga ki LTJG Eidderf Lloyd A Olea, Spokesperson, PCG Camarines Sur, dako an tabang kan saindang mga Coast Guard Auxiliary na nagsilbing dugang na manpower sa pagmantinir kan kaayusan sa mga lugar na dinadagsa kan publiko.
Sa mga nagdangog na aldaw, padagos an pagdamo kan mga pasahero sa mga pantalan. May mga pag-aral man giraray sa posibleng pagtaas kan pamasahe, alagad sinisigurado na ini susunod sa mga regulasyon.
Sa Pasacao Port, mas pinahugot an pagbabantay asin istriktong ipinatutupad an passenger limit sa kada sakayan. Halimbawa, kun 150 sana an kapasidad kan sarong sakayan, ini sana an dapat sundon asin dai pinapahilingan na maglabis pa digdi.
Pinapayuhan man an mga pasahero na mag-book na nin saindang tiket nang mas temprano tanganing malikayan an pagka-stranded. Kun sakaling dai makasakay, may mga alternatibong ruta na pwedeng agihan, kabilang an sa Butawanan asin Pilar, Sorsogon.
Handa man an Philippine Ports Authority (PPA), kaiba an lokal na gobyerno asin an Philippine National Police (PNP), sa pag-asikaso kan pagdamo kan mga biyahero asin pagmantinir kan seguridad sa mga pantalan.
Segun sa Coast Guard, nagpoon na an pagdagsa kan mga pasahero hale pa kan Lunes, asin inaasahan pa an mas dakulang pagdamo pagsapit kan Miyerkules sagkod Biernes, banggi kan Semana Santa, tanganing maabot an mga destinasyon bago an mga pangunahing aktibidad. Posible man na magpadagos ini sagkod Sabado.
Padagos an paandam kan mga otoridad sa publiko na maglikay asin magplano nin maayos na biyahe tanganing malikayan an abala asin peligro sa paglalakbay.
