All systems go’ na an Commission on Elections (Comelec) para sa isasagibong May 12, 2025 National and Local Elections (NLE) sa Lunes.
Sigun ki Comelec Chairman George Garcia, pirang aldaw antes man an halalan ay nasa haros 100% na an delivery kan automated counting machines (ACMs).
Nagpuon na man kan nakalihis na aldaw nin Martes an delivery kan huring batch nim mga official ballots para sa National Capital Region (NCR), na maabot sa 7.5 milyon.
Sigun ki Garcia, enot na nindang naiheras sa mga treasurer’s office kan mga munisipyo asin siyudad an mga balota para sa iba pang rehiyon sa nasyon Kan mga nakalihis na aldaw.
Kan aldaw man nin Martes, kabali sa mga primerong dinarahan kan mga balota iyo man an Caloocan, Marikina, Pasig, Valenzuela, Quezon City, Malabon, Navotas, asin San Juan City.
An shipping man kan mga balota para sa Muntinlupa, Pateros, Taguig, Manila, Makati, Pasay, Las Piñas, Mandaluyong, askm Parañaque ay nagpuon kan aldaw njn Miyerkules Mayo 7. Ihahatod soboot an mga official ballots sa treasurer’s office kan kada syudad.
An pagheheras man kan balota sa mga voting precincts ay isasagibo sa irarom man kan pangangasiwa kan electoral board members asin pupuonan sa Dominggo, Mayo 11, hasta man sa pagkaaga aldaw mismo kan halalan sa Lunes.
