NAGA CITY- Preparado na an Comelec Goa para sa pagpuon kan filing of Certificate of Candidacy sa Oktubre 1 hasta 8, 2024.
Sa entrevista kan Bombo Radyo Naga ki Dionisio Miguel, Election Officer kan Comelec-Goa, sinaysay kaini na nag-print na soboot an saindang opisina nin COC form kan mga kandidato na madalagan sa posisyon na Mayor hasta Municipal Councilor.
Sigun sa opisyal, pwede na magkua nin form an mga madaralagan alagad an filing kaini an isasagibo sa October 1 hasta 8.
Katakod digde, liwat man na pinagirumduman ni Miguel an mga kandidato na kaipuhan fill upan an gabos asin mayong blangko nin huli ta posible ini na magin grounds for disqualification.
Apwera digde, kaipuhan man an 1 documentary stamp asin 7 copy an kaipuhan sa pag file.
Huli kaini, pigsuhestyon kan opisyal na ipa-xerox na nin 7 copy an pig fill upan na form kun saen yaon na an documentary stamp asin saka ini pirmahan antes na ipasa.
Sa ibong na lado, para man sa ma file nin saindang kandidatura para sa Congressman asin iba pang higher positions na gikan sa Camarines Sur kaipuhan na magpasiring sa Provincial Capitol asin duman magsunad kan saindang COC.
Para man sa igwang mga kapartido o grupo, kaipuhan man na igwa kan partido certificate of nomination and acceptance alagad kun mayo, magigin independent an sarong kandidato.
Sa ngunyan, nagpakol na sa 41, 654 na botante sa Goa kan nakalihis na July alagad kasuudma, nadugangan pa ini nin nasa 1, 591 para sa pending.
