Nagpakol na sa labi 6,000 an total na bilang kan mga bagong rehistradong botante sa syudad nin Naga puon Oktubre 2025 sagkod Marso 2026, segun sa Commission on Elections (Comelec) Naga.
Sa entrevista kan Bombo Radyo Naga ki Atty. Maico Julia (Election Officer, Comelec-Naga), sinabi kaini na maabot sa 2,400 an narehistro poon Oktubre hasta Disyembre 2025, mantang an bilang nag-abot sa 4,400 poon Enero hasta Marso 2026. Segun saiya, mas halangkaw an turnout kumpara sa mga nakaaging taon, dawa ngani barangay asin SK elections sana an nagdadangadang.
Paliwanag kaini, usually, nagdadakula an bilang kan mga nagpaparehistro sa pagpoon asin orog na sa mga huring aldaw antes an deadline. Huli kaini, piglalaoman kan Comelec Naga an pagdagsa kan mga aplikante sa natatadang mga aldaw kan rehistrasyon.
Kadaklan sa mga bagong nagparehistro gikan sa sektor kan mga jovenes, partikularmente an mga nag-eedad 15 hasta 25 anyos na parte kan mga botante kan Sangguniang Kabataan (SK).
Sa ibong kan paglangkaw kan mga aplikante, aminado an opisyal na nagkaigwa sinda nin nagkapirang angat arog kan kakulangan nin manpower, halawig na pila, asin crowd control. Sa ibong kaini, pigsierto kaini na padagos an saindang pig-aadjust na sistema tanganing maparikas an proseso, urog na sa huring aldaw kan rehistrasyon.
Tanganing maseguro an integridad kan voter list, mahigot na pigbeberipika kan Comelec. Kaipuhan an birth certificate para sa mga menor de edad asin ID na itinao kan gobyerno para sa mga 18 anyos pataas. An mga aplikante nag-aagi man sa sarong pagdangog kan Election Registration Board (ERB) kun saen an saindang mga kwalipikasyon pwedeng kuestionon.
Naggagamit man an ahensya nin fingerprint identification system tanganing maibitaran an doble o multiple registration.
Pagkatapos kan deadline kan rehistrasyon, an mga pagdangog kan ERB gigibohon sa sunod na pag-aprobar o dai pag-aprobar kan mga aplikasyon. Susundan ini kan paggibo nin “project precincts” na madeterminar kun saen maboboto an lambang rehistradong botante.
Mientrastanto, nagpatanid an Comelec sa publiko kontra sa vote-buying. Segun sa opisyal, an pag-ako nin kwarta karibay nin boto pwedeng magkawsa nin mas darakulang problema sa pamamahala sa maabot na panahon.
An mga dae pa nakarehistro, pig-eengganyar man na magduman sa opisina kan Comelec bago mag-abot an deadline. Sa presente, bukas an voter registration poon Martes hasta Sabado, segun sa bagong schedule kan ahensya.
An Barangay asin Sangguniang Kabataan Elections nakatalaan na gibohon sa Nobyembre 2, 2026.
