NAGA CITY – Pigpepreparan na kan Commission on Election (COMELEC)-Naga an 2nd wave kan Operation Baklas sa siyudad.
Sa nagin paghampang sa mga kagawad kan media ni Atty. Maico Julia Jr., Election Officer kan COMELEC Naga, sinaysay kaini na sa maabot na Marso 28 an pagpuon kan Campaign period para sa Local candidates kun kaya magkakaigwa nanaman nin operation baklas sa bilog na nasyon.
Sigun ki Julia, nagkaigwa naman nin pagposte kan listahan kan mga precinct kan mga botante, kun nasa 181,773 na rehistradong botante kan siyudad.
Dugang pa digdi, ngunyan man na bulan mapuon an patraining sa mga paratukdo na masirbing sa election day.
Mantang ia-activate man an kontra bigay tanganing malikayan an pagbabakal nin boto. Siringman, tanganing maaraman kan mga botante kun gurano ka importante an saindang boto, bako nin huli ta may naitaong kwarta an kandidato sa sainda.
Mientrastanto, sa presente mayo nin nagparehistro para sa Absentee Voting sa saindang opisina kun saen para sana ini sa mga media personnels.
Alagad igwa nin nagpalista nin PNP personnel para sa Absentee Voting.
Marurumdoman, sa absentee voting sulamenteng mga senatorial candidates asin partylist sana an pwedeng botohan.
