Nalampasan na kan Commission on Elections (COMELEC) sa banwaan nin Tinambac an saindang target para sa voter registration makalihis na makarekord nin total na 10,505 na bagong rehistro poon Abril 1 hasta Mayo 18, 2026.
Sa intrevista kan Bombo Radyo Naga ki Kirk Thomas Tate (Election Officer, Comelec-Tinambac), saiyang sinabi na nagin matrayumpo an ginibong satellite registration sa manlaen-laen na barangay sa pagdara nin serbisyo sa mga namamanwaan, orog na sa mga jovenes na may edad 15 hasta 17 anyos na miyembro kan Sangguniang Kabataan (SKK).
Kan huring aldaw kan rehistrasyon kan Mayo 18, maabot sa 226 na indibidwal an naghagad nin rehistro, kun saen 80 an mga SK applicants.
Dawa ngani maray an crowd control kan huring aldaw kan operasyon, nakaeksperyensya nin nagkapirang agyat an opisina arog kan haros sarong oras na blackout asin biglang pag-uran na nagcausa nin humid na sitwasyon sa palibot kan opisina.
Apwera sa voter registration, padagos man an pagtulod kan COMELEC sa voter education campaign, partikularmente sa mga first time voters. Makusog man an patanid kan ahensya sa publiko laban sa vote buying asin vote selling na inapod nindang “cancer of democracy” asin saro sa mayor na ugat kan korapsyon.
Mientrastanto, itinalaan na kan COMELEC an mga masunod na lakdang manungod sa rehistrasyon. Poon Mayo 19 sagkod 20, an listahan kan mga aplikante ipapaluwas asin ipapapaskil, mantang an mga oposisyon laban sa mga aplikasyon pwedeng isampa sagkod sa Mayo 28. An pagdangog kan Election Registration Board nakatalaan man sa Hunyo 1, 2026 para sa opisyal na pag-aprobar o dai pag-aprobar kan mga aplikasyon.
