Nag-abot na sa labing 3,000 an bilang kan mga aplikante na nagparehistro bilang botante sa banwaan nin Pili makalihis an serye nin satellite registration na ginibo kan Commission on Elections (COMELEC).
Sa entrevista kan Bombo Radyo Naga ki Atty. Fatima O. Gados-Pani-Agua (Election Officer IV, Comelec-Pili), saiyang sinabi na maray an pag-ako kan mga barangay sa satellite registration activities. Sinabi niya na dakula an nagin papel kan mga barangay officials sa pagpalakop nin impormasyon tanganing ma-engganyar an mga residente na magparehistro.
Ipinaliwanag man kaini na an lambang aplikasyon nag-aagi sa mahiwas na pagrepaso tanganing masierto na kwalipikado an nagrerehistro susog sa Omnibus Election Code asin eksistidong resolusyon kan COMELEC.
An Lupon nin mga Inspektor sa Eleksyon na nag-aaprobar o dai nag-aaprobar kan mga aplikasyon binibilog kan opisyal sa eleksyon, sarong representante hale sa Departamento nin Edukasyon, asin an lokal na rehistrador sibil o tesorero munisipal bilang pansalida kun kinakaipuhan.
Base sa record kan COMELEC, puon Oktubre sagkod Disyembre, labi nang 1,000 an nairehistro. Puon Enero 5 hasta Marso 31, naglangkaw ini nin labi sa 3,000 na aplikante.
Mientrastanto, pagkatapos kan deadline kan rehistrasyon, tulos na mapreparar an COMELEC para sa pag-finalize kan voters’ list para sa maabot na Barangay asin Sangguniang Kabataan Elections sa Nobyembre 2. Kabali man sa preparasyon an pagbilog kan electoral boards, barangay boards of canvassers, pag-file nin certificates of candidacy (COC), asin campaign period.
N
