Pinakusog kan barangay kapitan kan Grande an mga aktibidad kontra dengue
Sa intrevista kan Bombo Radyo Naga ki Jerrold Rito – Barangay Captain, Concepcion Grande, Naga City, ipigheras kaini na makondusir nin manlaen-laen na aktibidad an mga barangay tanganing maiwasan an pagdakul kan mga kaso nin dengue, kaiba digdi an dengue awareness program, clean-up drive, asin iba pang kampanya manungod sa paglikay sa nasambitang hilang.
Segun ki Rito, kada bulan nagkokondusir an barangay nin clean-up drive, partikularmente sa mga lugar na halangkaw an posibilidad na magkaigwa nin kaso nin dengue. Kaiba sa mga aktibidad an regular na paglilinig kan kapalibutan tanganing mabawasan an mga lugar na pwedeng pag-istarahan asin pagparamihan kan mga lamok.
An mga barangay health worker, kaiba an iba pang barangay personnel, an nanginotan man sa pagsagibo nin house-to-house awareness campaign. Sa aktibidad na ini, tinutukdo sa mga residente an tamang kalinigan, partikularmente an pagmantener nin malinig na kapalibutan.
Segun pa ki Rito, igwa naman naitalang 30 kaso nin dengues sa Barangay Concepcion Grande sa Ciudad nin Naga asin mayu man naitalang pagkagadan konektado sa dengue.
Pinagirumduman kaini an publiko na mantiniron an kalinigan sa palibot kan harong asin dae magtugot nin mga lugar na pwedeng pagdakulan kan lamok tanganing maprebentuhan an pagdakul pa kan mga kaso nin dengue.
