NAGA CITY– Mas nagabat sa ngunian an trapiko sa syudad nin Naga makalihis an amay na pagpapasara kan nagkapirang mga tinampo na aagihan kan prusisyon kan Itom na Nazareno atyan na banggi.
Napag-araman na alas-8:00 pa sana nin aga kan isara na an kalabaan kan tinampo sa Biak na Bato para tawan dalan an mga debotong padagos an pagbulos sa Holy Cross Parish sa Barangay Tabuco kunsaen nagtitinir an imahe kan Itom na Nazareno.
Sa entrevista kan Bombo Radyo Naga ki SPO2 Tobias Bongon, tagapagtaram kan Naga City Police Office (NCPO), sinaysay kaini na magtitinir na nakasara an nasambitan ng tinampo hasta alas 10:00 nin banggi.
Tinawan duon man ni Bongon na may binilog naman na plano an Joint Operation Center (JOC) para malikayan an mas gurubot na mga lunadan sa tahaw kan prusisyon atyan na banggi.
Sigon ki Bongon, may pagkakapareho soboot an saindang binilog na contingency plan sa pagselebrar kan kapyestahan ni Nuestra Señora de Peñafrancia tuyong bulan nin Setyembre.
Napag-araman na alas 5:00 atyan na hapon, papangenotan ni Rev. Msgr. Noe Badiola, Pariest Priest kan Saint John the Evanelist Parish an misa sa nasambitan ng simbahan antes na iluwas an imahe kan Black Nazarene para sa gigibuhong prusisyon.
