Nakapreparar an mga contingency plans kan Philippine National Police (PNP) enkaso magluwas nin arrest warrant an International Criminal Court (ICC) kontra ki Sen. Ronald ‘Bato’ Dela Rosa.
Ini an pigsierto ni bagong PNP Chief PGen. Nicolas Torre III sa sarong pulong balitaan sa Kampo makalihis na maitalaga asin manumpa komo bagong hepe kan organisasyon kan nakalihis na aldaw nin Lunes.
Sigun ki Torre, an mga lakdang na ini an parte kan saindang preparasyon tangani masiguro na magigin pakarhay an pagpapautob nin ley asin magkaigwa nin legal na proseso an posible na magin pag-arestar ki Dela Rosa.
Soboot, nakapreparar an saindang hanay nin mga contingency plans tangani masiguro na aram na kan saindang kapulisan an mga dapat gibuhon enkaso man na magluwas tulos nin warrant an ICC mapadapit digde.
Mientrastanto, dae man na tinawan nin detalye pa ni Torre an mga contingency plans na ini alagad pigsierto man kan hepe na magibo nin desisyon an gobyerno oras na kaipuhanon.
Bagaman igwa nin mga plano na an saindang hanay ay dae muna ini ibubuyagyag an saindang mga preparasyon asin sinabing ini an sarong bagay na kaipuhan na aksyunan oras na yaon na asin man saka mabilog nin desisyon oras na may pinal nang anunsyo o nakapagsunad na nin warrant an korte kontra sa Senador.
Pigsierto pa ni Torre, na andam an PNP na ipa utob an dawa na ano man na ligal na kasuguan gikan sa ICC kabali na digde an posibleng pagarestar ki Dela Rosa.
Mientrastanto, naenot man digde ay inamin kan senador na preparado ini na akuon an mga akusasyon magin an warrant enkaso man na magsunad an korte kontra sa saiya.
Nagpahayag man si Dela Rosa na enkaso magluwas an warrant ay plano kaining magdulok asin maghagad nin proteksyon sa Senado na tulos man na senegundahan ni Senate President Francis ‘Chiz’ Escudero
