Nagbaba an crime rate sa bilog na nasyon nin 13.96% siringman an focus crimes na nagbaba man nin 14.01%, sigun sa PNP.
Gikan sa tulong bulan na report kan Philippine National Police (PNP), nagbaba nin 13.96% an crime rate sa bilog na nasyon.
Basado sa iniluwas na datos kan ahensya, puon sa lampas 6,000 kasong nairehistro puon July hasta August 25 nagin lampas 5,000 kaso na sana puon August 26 hasta October 30 an nairehistro.
Mientrastanto, an focus crimes siring kan murder, homicide, rape, physical injury, carnapping, asin theft nagbaba nin 14.01%.
Puon sa lampas 6,000 kaso an nagin lampas 5,000 kaso na sana an naikurit sa parehas na mga bulan.
Sigun ki PNP Acting Chief Lt. Gen. Jose Melencio Nartatez Jr., an gabos na trayumpong ini parte kan PNP Focus Agenda.
Obheto kaini an pagpapahigot sa tamang paggamit kan mga yaman kan organisasyon, pagbubusol sa kapakanan asin moral kan kapulisan, asin pagpapapusog nin operasyon sa paagi kan makabagong paagi kan pulisya.
